Түркі Академиясының кітапханасында түркітану ғылымына қатысты 70 000-ға жуық дереккөз бар. Бұл саладағы жетекші кітапханалардың бірі ретінде түркі тарихы, тілі, әдебиеті, фольклоры, мифологиясы, өнері және т.б. салалар бойынша зерттеушілер мен ғалымдарға қажетті ақпарат пен дереккөз орталығы қызметін атқарады.
Кітапханадағы ресурстар Әбдуәли Қайдар, Әбжан Құрышжанұлы, Рәбиға Сыздық, Ахмет Зеки Велиди Тоған және Иштван Мандоки Қоңыр сияқты түркітану саласындағы беделді ғалымдардың жеке кітапхана қорларынан, сонымен қатар әлемнің түкпір-түкпіріндегі академиялық мекемелерден, ғылыми орталықтардан және мәдени ұйымдардан жинақталған.
Сонымен қатар кітапханада сирек кітаптар, қолжазбалар, тарихи құжаттар және түркітанудың белгілі салаларына қатысты бірегей материалдардың арнайы жинақтары сақтаулы. Түркі Академиясының құрылғаннан бері әзірлеп жариялаған 150-ден астам ғылыми еңбек те кітапхана оқырманына ұсынылған.
Түркі Академиясының кітапханасы түркітану ғылымына қызығатын студенттер, зерттеушілер және ғалымдар үшін маңызды дерекқор ұсынады.
